كتب سالم دبوس* 
نيال اللي ولد وعاش وحيموت براس بيروت
نيال اللي شرب من ميتها
نيال اللي عاشر ناسها واهلها
نيال اللي اتمشى على كورنيشها وشم هواها من بحرها
نيال اللي سبح بالسبورتنغ وباللونغ بيتش واكل بطاطا وكانشب هوي وعم يتشمس
نيال اللي اتمشى بشوارعها بجو خريفي وحاطط ايديه بجيابو من البرد
نيال اللي شاف شارع الحمرا بعزه
نيال اللي اشترى نقيفة من عند الحاج ضو
نيال اللي اكل بيتزا عند الكابتن بفلايينغ بيتزا
ورش عليها خلطة الحر السحرية
نيال اللي جبر اجرو عند الجرجورة بشارع بلس
نيال اللي شرب فريسكو عند الطرزي
نيال اللي كان يلبس بنطلون جينز رانغلر او لي كوبر ومعو صبات الكلارك
نيال اللي لعب تنس بملعب النهضة
او باسكت بول بالنادي الرياضي
نيال اللي اكل همبرغر عند يونڤرسال او عند هانيز مع السالاد روس
نيال اللي شرب قهوة بالسيتي كافيه بطقس خريفي وكان قاعد جنبو بول شاوول عم يقرا كتاب
نيال اللي حضر فيلم لبروس لي بسينما اتوال او بسينما ستراند
نيال اللي قص شعرو عند خليل مايك وخبرو خبار ما بيخلصو
نيال اللي حضر كرمس شارع المكحول وكانت مسكرة الطريق والناس مبسوطة عم بتهيص
نيال اللي اكل عند مروش مع اهلو وكان يتفرج على السمكات عم يسبحو والعصافير طاوشين المطعم
نيال اللي حضر عيد السيدة بكنيسة السيدة الارذوكسية
نيال اللي حضر التواشيح على باب جامع شاتيلا
بذكرى المولد النبوي
نيال اللي اتبارك بالاب جرمانوس واتصبح بالشيخ طقوش
نيال اللي سمع جرس كنيسة سانت ريتا وصوت اذان ابو عدنان الداعوق من جامع شاتيلا
نيال اللي اتصيد سمك على البراميل جنب مينا الصيادة
نيال اللي كان يعمل رياضة صباحية على الكورنيش بين الحمام العسكري وعين المريسة
ويصبح على كل الناس
نيال اللي اشترى بوكيه ورد من عند الطقوش وعطاه وردة بيضا هدية عالبيعة
نيال اللي شرب كوكتيل عند بلس هاوس واكل صحن يومي بمطعم صوفر بالحمرا
نيال اللي سهر بالبلو نوت وحضر لايف باند كل نهار سبت
نيال اللي اكل بوظة على حامض من عند مركيز
نيال اللي اكل منقوشة من عند فيصل
واتحلى مفروكة من عند تاج الملوك
نيال اللي اشترى وشرب قنينة بيرة مسقعة من عند سكور ماركت وحكي سياسي مع القومي السوري العتيق ابو الميش
نيال اللي اكل ساندويتش حركاتو من عند ابو عفيف
نيال اللي كان يتبضع لبيتو من سوبر ماركت باتريك سميث او من عند مستودعات شاتيلا او من عند الحاج سليم عيتاني
نيال اللي استأجر فيلم ڤيديو من عند شيكو
وما رجعو
نيال اللي اتعرف على المبيض خيارة اللي هوي نفسو كان المسحراتي بشهر رمضان
نيال اللي ارغل راس عجمي بقهوة الروضة
نيال اللي اجا على هالدني على ايدين دكتور خالدي بمستشفى خالدي
نيال اللي اشترى كتاب من مكتبة فور ستبس داون بالحمرا او من مكتبة انطوان
نيال اللي طلعو ڤيكتور زيارة على مبنى المنارة ليشوف منظر ما ممكن ينساه بحياتو
نيال اللي حضر مسرحية شي فاشل لزياد الرحباني بمسرح الجان دارك او حضر مسرحية صيف ٨٤٠ بالبيكاديللي وشاف سيف البحر عم يغني لمعت ابواق الثورة
نيال اللي ضاق طعمة رغيف الخبز او الفطاير على سبانخ من عند فرن زعرور
نيال اللي اشترى تياب من عند سبلانديد ستور او من عند محلات مكي بالحمرا
نيال اللي اشترى صبات من عند باتا بشارع الكومودور وكان ينطر الصولد ليشتري من عند الرد شو
نيال اللي لعب بلياردو عند ابو رياض وفيشلو ببلاش لما خلصو مصرياتو
نيال اللي لعب فوتبول بملعب الاي سي او بملعب الفجل بالجامعة الامريكية او بملعب النجمة
نيال اللي قطف حميضة من الضهرة
نيال اللي صف سيارتو حد اوتيل الريڤيرا على الكورنيش ليشرب فنجان قهوة من الاكسبرس وكان عم يسمع معرفتي فيك لفيروز مع طقش الموج
نيال اللي نزل بمظاهرات ايام الحرب مع اهل راس بيروت بشوارع راس بيروت هني وعم بيهتفو ما بدنا الطائفية اسلام ومسيحية
نيالو اللي كان يسمع فيروز ايام الحرب عم تغني لبيروت ومعلا صوت المسجلة وعيونو مدمعة
نيال اللي اكل ساندويتش روستو من عند ماسيس او بيتزا على سجق من عند بوباي
نيال اللي امو اخدتو تشتريلو لعبة من عند دونالد داك على كاراكاس
نيالي انا هيدول كلن عملتن
نيالهن اهل راس بيروت
ذكريات ما بتخلص
ذكريات حلوة حلوة حلوة
راس بيروت هوية
راس بيروت جنسية
راس بيروت اسلوب عيش
راس بيروت هيي الحياة
هيدي هيي راس بيروت
هيي احلى شي بالعالم
